Mevlana Külliyesi Tilavet Odası

Meḥmed Ṣādıḳ 1291

Mevlana Külliyesi Tilavet Odası girişindeki kûfî kitabe sayın Engin Mutlu tarafından 26.04.2026 tarihinde okunmuştur:

Ḳonya Ās̱ār-ı ʿAtīḳa Müzesi

1926 Meḥmed Yūsuf

Mevlana Külliyesi Tilâvet Odası’nın içerisinde bulunan Sultan II. Mahmut’un külliye tamir kitabesi Yrd. Doç. Dr. Hasan Özönder’in “Mevlana Türbe ve Külliyesinin Tamir ve İlaveler Kronolojisi” adlı makalesi ve Sayın Hasibe Durmaz’ın yardımlarıyla, Furkan Yiğit Gürleyik tarafından 28.04.2026 tarihinde okunmuştur:

Vezni: Feīlātün/Feīlātün/Feīlātün/Feīlatün

Budır dergāh-ı Mevlānā Celālüʾd-dīn veʾd-dünyā

Budır ki kaʿbe-i cān u cenāndır cümle ʿuşşāḳa

Bu meşhed-i nūrdan deryā o hażret-i dürre-i beyżā

Ḥabābı ḳubbe-i ḫażrā disem ḥaml itme iġrāḳa

Bunıñ her evc-i pākī uc virir şems-i ḥaḳīḳatden

Muḥāzı her biri maʿnīde ṭāḳ-ı çarḫ bī-sāḳa

Eleẕdir neyşekerden çūb-ı maṭbaḫ çille-keş cāna

Müraccaḥ ẕevḳ-ı ḫidmet yanlarında başḳa eẕvāḳa

İderler sikke bir ser-sikke-i zergerden istiġnā

Olub bī-ġıll u ġışş iksīr-i ḫāṣṣ pūte-i fāḳa

Girift-i ʿışḳ olurlar baş keserler ṭavḳ-ı teslīme

Ezelden beste gelmişler visāḳ-ı ʿahd u mīsāḳa

Yanarlar şemʿ-i cānāna cihān u cān bir yana

Dönerler hemçū pervāne virirler varın iḥrāḳa

Gehi āzād olub ġamdan geçüb fikr-i dū ʿālemden

Rebāb u nāyı eylerler bedel-i taḳyīd ve ıṭlāḳa

Bunıñla şehr-i Ḳonya faḫr ider Īrān u Tūrāna

Bu buḳʿa ḳıble-gāh ārzūdır bunca ʿuşşāḳa

Mürūr-ı vaḳt ile ḥācet olub taʿmīre bu ḫayrı

Müyesser ḳıldı Ḥaḳḳ şāhenşeh-i pākīze aḫlāḳa

Zehī ḳuṭb-ı himem ṣāḥib-i kerem-i Sulṭān Maḥmūd Ḫān

Odır şems-i żiyā-baḫş ʿināyet cümle āfāḳa

Dil-āgāhı māil biʾt-ṭabʿ-ı ḫayr u müberrāta

Mübārek ṭabʿı muḳbil-i ʿadl u dād u raḥm u işfāḳa

Ḳalemler münḥaṣır aḥkām-ı ʿadlin neşr u taḥrīre

Ḫazāin-i sū besū meşġūl ʿiṭāsın beẕl u infāḳa

Cemāl-i şevketi tenvīr sırr-ı sūre-i veʾş-şems

Cebīn-i ṭalʿatı teşbīh-i rūşen ṣubḥ-ı berrāḳa

Muvaffaḳ oldıġı bī-şübhedir her kār u bārinde

İder her emrini tefvīż zīrā Rabb-i Ḫallāḳa

O şāh-ı muʿcizāyīniñ nevā-yı feyżidir her dem

İden bu nāy-ı kilki böyle maẓhar-ı sırr-ı inṭāḳa

İki tārīḫ mülhem oldı pertev-i maṭlaʿ-ı dilden

Sezādır beñzedilse fırka-i dîn şems-i işrāḳa

Yapıldı dergeh-i Monlā budır çūn kaʿbe-i ʿuşşāḳa

Ṭavāfa gel duʿā it yapdıran sulṭān-ı āfāḳa

1251

Nuṭḳ-ı niyāz bende-i īşān Pertev nācīz u nātüvān

Feyż alur dergeh-i Mevlānāda Es̱er-i kilk-i Yesārī zāde